-          Ataques a la situación d’ameyoramientu y axixamientu del català en Catalunya.

-          Alianza PP-PSOE n’Euskadi, pucherazu nes eleiciones, nueves polítiques llinsgüístiques (arrequexamientu).

-          Valtu de la oficialidá de la llingua asturiana nel nuevu Estatutu d’Autonomía.

-          Valtu de la oficialidá del aragonés y el català n’Aragón.

-          Apuerta’l PP a la Xunta Da Galiza, persecución del galego.

-          Criminalización y persecución de la Ezkerra Abertzale.

-          Mínima y feble reconocencia de la llingua’l país tres el cordal.

-          Criminalización y campaña ultranacionalista española contra les consultes independentistes en Catalunya.

-          Movilización de les “Falanges” en pro de la “unidad de la patria” como rempuesta a les aiciones n’Euskadi y Catalunya de caráuter nacionalista.

-          Ocultamientu de les aiciones del sindicatu de calter andalucista en defensa de los puestos de trabayu y llucha social.

Podríemos siguir enumberando una llista muncho más llonga qu’esta, pos les aiciones españolistes nun se llenden a estes y tienden a repitise y caltenese nel tiempu. Como se pue ver, estos fechos, amuesen un reblagu nel poder haza’l nacionalismu español más ranciu y escluyente.  Poco a poco van atacando a los drechos de les naciones que componen esti gafu estáu. Emprimen coles aiciones contra la “imposición” de les llingües llariegues y nacionales, y en “defensa” de la Llingua Imperial. Sofitándose n’imposiciones inesitentes, engañen a la xente y valiéndose de mieos fatos arrástrenla a la so llamuerga del xuegu. Llueu pasen a xeneralizar y criminalizar toles idees qu’atenten escontra’l so gran imperiu colonial, persiguen y ataquen a tolos qu’atalantamos entremaos, a tolos que cuestionamos el so sistema y la so verdá, a tolos que mos paramos a pensar qu’otra sociaedá ye, amás de posible, necesario. Pasu ente pasu esi discursu imperialista y fascista va caltriando pente sociedá. Prensa, radio y televisión trabayen venticuatro hores pal Imperiu, los “grandes” partíos políticos (PP-PSOE) difunden día a día’l discursu de la illegalidá de les nueces aiciones, l’exércitu policial como mano executora del persiguimientu y les detenciones.

Toa esta riestra d’asocedíos a la deseperada cuido que nun son más qu’una amuesa de la debilidá del so estáu, de la impotencia que sienten. La casual creación de recién d’un partíu que se sofita na nacionalidá española, nos valores d’España como: una, non camudable, monollingüe... etc.; como alternativa a les polítiques pro-separatistes "qu’afalaguen" el PP y el PSOE nun pue ser dalgo que mos pase desapercibío. Esta nueva bisagra ultra-españolista qu’arremete contra una y otra llingua, que defende la supuesta aunidá nacional del estáu, que quier que se desanicien les Comunidaes Autónomes pol supuestu frañimientu anti-ñatura d’España que traen arreyao; nun ye otro qu’un intentu de llanciar pilancos al desenvolvimientu de los movimientos nacionalistes, de volver tol poder a Madrid, d’albortar unes futures (y cada día menos llonxanes) lliberaciones nacionales.

Too esto faime pensar dalgo, y ye que nun lo tenemos que tar faciendo tan mal. Que nun debemos tar tan lloñe de la nuesa fin, que tienen más llercia enriba de la que la so faltona y bocayona boca podrá almitir enxamás. Esta situación, de llaceria, sapozamientu y represión, nun ye daqué que mos tea qu’echar p’atrás. Son aiciones desesperaes, como l'animal que se xebra una pata abocaos pa escapar d'una amarraza. Ye, polo tanto, un aliendu a la esperanza, un soplu d’aire frescu que mos amuesa que vamos per bon camín. Qu’anque tarde, la llibertá aportará. Poro, convídovos a toos a siguir bregando, a que la griesca nun caiga, a que mano a mano caltengamos la secha abierta y el llongu camín andáu ensin dir p’atrás. Porque xuntos podremos construyir un País llibre, una Asturies arguyosa de sigo mesma, un Pueblu solidariu y una Sociedá moderno, crítico y que-y pruya la so situación y asitamientu nel cosmos.

NIN UN PASU P’ATRÁS. ASTURIES VIVE, LA LLUCHA SIGUE!