El discu nuevu de Dixebra, que va llevar por títulu Amor incendiariu y va salir a la cai col sellu L'Aguañaz, va tar nes tiendes a lo llargo de la primer quincena d'ochobre, según avanza Xune Elipe nun reportaxe que va salir publicáu esti vienres na edición impresa de LES NOTICIES. La presentación en directo va facese'l 1 de payares, dientro de los actos de Llanes al Cubo.

Amor incendiariu ye'l primer discu d'estudiu de la banda en cuatro años. Dende que sacaren Ensin novedá (2005), los componentes de Dixebra namás sacaren el discu en directo N'acción (2007), onde rexistraben el conciertu que dieren n'El Parche d'Avilés pa celebrar los sos venti años de carrera. Un añu depués aparecía ¡Salú ya Dixebra! Perversiones (2008), un discu homenaxe onde dellos grupos asturianos versionaben dalgunes de les sos canciones más conocíes.

Amor incendiariu va tener, según anuncia Elipe, ente doce y catorce canciones y va suponer la vuelta del grupu al soníu punk-rock que lu caracterizara dende qu'empezó.