Les Noticies
OPINIÓN. XUNE ELIPE
7 de xineru de 2009

La pérdiga d'argumentos de los detractores de la normalización y oficialidá de la llingua asturiana ye más qu'evidente nestos últimos años. Escomenzaron colo de que nun esistía mesmamente un idioma propiu d'esta tierra, depués pasaron a lo de los milenta bables, más tarde sacaron aquello de que yera articifial, depués abellugáronse tres la falacia de que nun había demanda, col tiempu inventaron lo de que diba ser carísimo, y d'ehí llegaron a lo de la imposición.
Últimamente tán los mandamases de la FSA toos esprecetaos por facer llegar a la ciudadanía'l mensaxe de que detrás de «lo del bable» hai otros intereses ocultos, unos fines realmente macabros y espantibles que perxudicaríen la convivencia pacífica ente asturianos. Por eso s'oponen tan xabazmente a la oficialidá, por cuidanos a toos d'esi monstruu que quedaría llibre si llegare a promulgase tala reconocencia. Namás dende la falta d'argumentos intelixentes y lóxicos pue entendese esta posición, nun-yos queda más que'l recursu al mieu. Esti emplegu del mieu irracional como elementu del xuegu políticu ye'l mesmu (con toles distancies que se quieran) qu'utilizaron los nazis colos xudíos na Alemaña de los años cuarenta; el presentar a un grupu determináu como un peligru llatente pal restu de la sociedá ye la mesma filosofía que tán esponiendo anguaño los responsables políticos d'Asturies. Palabres como les de Javier Fernández o Fernando Lastra asina lo afita: dicir que la oficialidá llevaría l'ascensu del «nacionalismu escluyente» (como si'l d'ellos nun lo fuere), o que supondría la obligatoriedá (cásique a sangre y fueu) del asturianu, respuende al mesmu pensamientu intransixente y represor d'aquellos que quixeron ser los amos del mundu. Nun reconocer un derechu a una mayoría o minoría de ciudadanos cola sida de qu'eso diría en detrimentu de la llibertá de los otros ciudadanos, ensin prueba nenguna y col únicu argumentu del «porque yo lo digo», tien un nome: autoritarismu. La utilización del mieu ye l'últimu recursu de les dictadures; ye la fase que tamos viviendo anguaño n'Asturies («cuidáu con estos del bable que detrás d'ellos hai unes fuercies malignes que son les que realmente mueven los filos...»).
La so «solución final» a esti problema (pa ellos únicamente) de la llingua asturiana yá taba pensada y pactada: nun yera otra qu'aquello del «patrimoniu llingüísticu» de la reforma del Estatutu fallada. Convertir esta llingua nesa patraña llegal supondría cenciellamente firmar la so partida de defunción. Habrá daquién que piense qu'esta comparanza ye escesiva y hasta una barbaridá, pero non menos que les fataes y babayaes que tenemos qu'aguantar los defensores del nuestru idioma, como aquella de que «detrás del bable vienen les metralletes» que dalgún d'estos bienpensantes soltó ensin ponese coloráu hai un tiempu. Pa esti añu, en Halloween, voi amazcarame de bable... ¡uuuuiiiii, qué mieu! Mentanto, pasa a la resistencia.

Llunes 5 xineru de 2009.
El portavoz de la Xunta pola Defensa de la Llingua Asturiana, Xulio Casado, declaró esta mañana por cuenta de la polémica surdida pola non inclusión del asturianu na negociación de la financiación autonómica que "l’asturianu ye una llingua viva claramente discriminada que cuenta con un apoyu social bultable y que vive nuna situación total d’abandonu poles alministraciones públiques. Les declaraciones feches por Javier Fernández y l’actitú que caltién el Gobiernu asturianu namás se puen entender dende’l puntu de vista de querer acabar col nuestru patrimoniu llinguísticu a mediu plazu. El fechu de que se faigan los sordos sistemáticamente a los informes del Conseyu d’Europa o a les voces que dende dientro y fuera d’Asturies reclamen que s’adopten unes midíes urxentes y firmes pa parar el desaniciu del idioma propiu d’Asturies ye la demostración palmaria d’ello. Si nun se tomen estes midíes, al asturianu nun-y queden oportunidaes de vida como llingua d’usu común de los ciudadanos y ciudadanes. N’Asturies nun esiste nenguna d’estes ferramientes. Contamos con un sistema educativu que nun garantiza los derechos de los estudiantes, especialmente na enseñanza secundaria y na Universidá; los avances en toponimia son la mayoría de les veces papel moyao (nun hai más que ver la TPA pa dase cuenta); los ciudadanos siguen teniendo torgues a la hora d’espresase na so llingua cola alministración; la Llei d’Usu nun s’aplica na mayoría de los casos y, lo que ye pior, nin siquiera se contempla nos planes del Executivu actual; pa más esmolecimientu, la FSA y el Partíu Popular siguen faciendo declaraciones onde sorrayen que l’asturianu nun va ser una llingua oficial enxamás, si d’ellos depende".

Xulio Casado quixo añadir al final de les sos declaraciones: "Llámanos muncho l’atención qu’al final lo que s’usa ye a la llingua como un arma política que val pa disputar les guerres internes del Executivu, cuando nin siquiera se pactó un camín medianamente curiosu pa la normalización del idioma na negociación pa formar parte del equipu que ta al frente de la política autonómica d’Asturies. Ye más que nunca necesario esclariar que la oficialidá ye necesaria pa la sobrevivencia de la llingua y non un comodín pa xugar la partida de la correlación de fuercies del gobiernu".

Noticia sacada de la páxina web de la Xunta Pola Defensa de la Llingua Asturiana.

Una vegada más l'asturianu arequexáu pa too.

Oficialidá yá!