La Xunta pola Defensa de la Llingua Asturiana quier denunciar l’actitú irresponsable y contraria a los intereses de los ciudadanía que ta teniendo’l Gobiernu Asturianu na negociación de la financiación autonómica.

Nuna situación de crisis económica grave, falta de trabayu y recorte nos servicios públicos, los dirixentes asturianos, escoyíos pa procurar el bienestar y desarrollu de la sociedá, quieren más dexase llevar polos sos propios prexuicios y rechazar los millones d’euros (cuasique 30, nel casu de Galicia) que l’Estáu va tresferir a les comunidaes autónomes que recueyen nos sos estatutos la cooficialidá de les llingües propies.

D’esta manera, la clase política asturiana sigue aneciando non solo na falta de reconocimientu de la igualdá xurídica de los falantes d’asturianu, sinón tamién nel despreciu de partíes presupuestaries que diben valir, a un tiempu, p’asegurar derechos de los sos ciudadanos y pa estimular l’actividá económica d’Asturies.

L’usu d’argumentaciones demagóxiques y mentiroses pa tratar de confundir a la sociedá asturiana sobre la situación de desdexamientu evidente que sufre la llingua asturiana nun ye almisible, viniendo como vien de los responsables políticos que cobren por iguar y tornar la situación de retrocesu del idioma y d’indefensión de los sos falantes.

Por eso, dende la Xunta pola Defensa de Llingua Asturiana pidimos una reforma del Estatutu que reconoza la oficialidá de la llingua asturiana pa que los ciudadanos asturianos tengamos derechos cívicos y económicos fundamentales pal futuru d’Asturies.